Defense of the Ancient

7 Tips sa Magaling na Pagdo-DOTA

Kung libangan mo ang paglalaro ng DOTA, huwag maging pabigat sa iyong team. Huwag ka lang basta maglaro, be at your best din. Strive for excellence! Narito ang ilan sa mga tips mula sa award-winning Team Rave para hindi ka na matatawag na noob!

By ListAvengers and TeamRave

 

1. Know your Role. Sa ilang oras mong paglalaro ng DOTA kasama ng barkada, siguradong na-figure out mo na kung saan ka magaling at kung saan ka medyo tagilid. Ok naman ang pagfocus sa kagalingan pero huwag kalimutan na ang DOTA ay isang team sport. Pag oras na para umatake o dumipensa na magkakasama, mag-volt in at tulungan ang mga kalaro!

playingdotaPH

2. Ask Help and Learn from Others. Sa dinami-daming characters at items, hindi mo pa rin masasabing alam mo na ang lahat kahit gaano ka kagaling. Huwag matakot magtanong sa mga kaibigan o sa mga taong matagal ng naglalaro. Iwan mo muna sa bahay ninyo ang pride at makinig sa payo ng ibang manlalaro. In return, gawin din ito sa mga taong gustong matuto sa iyo. Ang saya kaya ng usapang DOTA pag joke time lang ang yabang.

mineski_teamrave

3. Map Control and Awareness. Aralin ang mapa at maging aware sa iyong posisyon sa lahat ng oras. Palaging maglagay ng observer wards sa rune spots o sa mga lugar na sa tingin mo ay makakakuha kayo ng sapat na vision upang makaiwas sa pag gank ng kalaban. Isa rin ang tip na ito sa makakapagpanalo sa inyo sa laro.

 mapcontrol in DOTA

4. Watch Professional Games. Kumuha ng inspirasyon hindi lang sa crush mong DOTA player kundi sa panonood ng mga replays/live games ng mga professional players. Tingnan mabuti kung ano ang style at moves nila para manalo. Subukan itong i-apply sa sarili mong laro. I-replay din ang sarili mong matches at i-check kung saan ka nagkulang o nagkamali.

dota 2 game 

5. Show Respect and Stay Calm. Be humble at down to earth sa tuwing sasalang sa match. Maging responsable at makitungo nang maayos sa ibang player mapa-kakampi man o kalaban. Iwas-iwasan ang trash talking dahil bukod sa maingay na at nakakasira ng focus, baka blood pressure mo lang ang tumaas at hindi ang score ninyo sa laban. Huwag ding magbintang ng kakampi, sa halip ay turuan ito para mas gumanda ang laro ng team ninyo.

 trashtalk_DOTA

6. Practice. Practice. Practice. Ito na yata ang pinaka-overused na tip na applicable kahit saan pero aminin ninyo, ito rin naman ang pinakamadali. Subukang maglaro nang hanggang 5 matches tuwing practice day para ma-preserve ang consistency ng iyong laro.Makakatulong nang malaki ang pag-master ng “last hit” at pag “deny” upang makalevel-up nang mabilis. Alamin din ang tamang pag kunsumo ng iyong mana, range ng iyong spells at huwag matakot mag-ekspiremento ng mga bagong item build at magbasa ng mga guidelines para pagdating ng totoong labanan ay ready na ready ka na!

dota items

7. Don’t Give Up! Ito ang kakambal ng tip #6, huwag kang susuko kung gusto mo talagang maging magaling. Puwedeng malungkot ng ilang oras kapag natatalo sa mga match, pero huwag mo ng paabutin pa ng days and weeks ang pagmumukmok. Lahat ng professional players, naging beginners muna. Walang shortcut sa greatness! Subok lang uli pagkatapos matalo. Ika nga ng kasabihan, “Don’t expect to win if you don’t know how to lose!”

DOTALOSER

Kung mayroon kayong naiisip na lis7ahan at nais maging miyembro ng Listavengers, mag-e-mail sa team.bamaquino@senado.ph!

BIDA KA!: Game On!

Mga Bida, naging laman ng balita kamakailan ang nangyaring pagkaka-offload sa tatlong miyembro ng Team Rave, isang Pinoy cyber sports team na pumang-anim sa katatapos na DOTA 2 Asian Championships (DAC).

 

Bilang isang tagasuporta ng online video gaming industry, naalarma ako sa balita, lalo pa’t sa aking pagkakaalam ay nakatakda nang mag-training ang Team Rave para sa mga darating na international tournament.

Kaya sumulat tayo sa Bureau of Immigration (BI) at Philippine Overseas Employment Administration (POEA) upang alamin ang dahilan kung bakit pinigil ang pagbiyahe nina Mark “Cast” Pilar, Djardel “Chrissy” Mampusti at Ryo “ryOyr” Hasegawa patungong South Korea.

 

Nakatakda sanang mag-training sina Pilar, Mampusti at Hasegawa sa South Korea para sa mga darating na international tournament, kabilang ang dalawang event sa Bucharest, Romania.

 

Layon ng aking pagsulat sa BI at POEA upang malaman kung ano ang ugat ng problema at kung paano ito masosolus­yunan para wala nang maging aberya sa susunod nilang pagbiyahe.

 

Noong Martes, inimbitahan ng POEA ang tatlo upang alamin ang tunay na nangyari noong araw na pigilan ang kanilang biyahe sa South Korea.

 

Sa nasabing pulong, nalaman na nagkaroon din ng kakulangan ang tatlo sa pagsunod sa payo ng mga ahente ng BI na nagresulta sa pagpigil sa kanilang biyahe.

 

Sa pulong nila sa POEA, nagkaroon din ng linaw ang tunay na estado ng Team Rave kaya nabigyan na sila ng tamang papel at naliwanagan na sa wastong proseso sa susunod nilang pagbiyahe.

 

Nakakapanghinayang man na hindi sila nakasali sa dalawang torneo sa Bucharest ngunit nagsilbing pagkakataon ang pangyayari upang maiwasto ang kanilang sitwasyon at papeles para sa susunod nilang biyahe ay wala nang offloading na mangyayari.

 

Isa pa, mas mahaba-haba ang oras nila sa pag-eensayo bilang paghahanda sa malaking torneo na gagawin sa Estados Unidos sa Agosto.

 

Maraming salamat sa POEA sa ginawa nitong tulong na maitama ang estado ng ating cyber athletes. Saludo rin ako sa BI sa pagtitiyak na ang lahat ng umaalis at dumarating sa bansa ay may tamang papeles.

 

***

 

Mga Bida, marami ang nagtatanong sa akin kung bakit todo ang suportang ibinibigay ko sa lumalagong online ga­ming development industry ng bansa.

 

Malaki kasi ang potensiyal ng nasabing industriya na makakatulong sa paglago ng ekonomiya ng ating bansa.

 

Marami nang kumpanyang Pilipino ang pumapasok sa industriyang ito, mula sa paggawa ng animation hanggang sa pag-develop ng software.

 

Ang katumbas nito ay daan-daang bagong trabaho at kabuhayan para sa ating mga kababayan.

Ang pagratsada ng industriyang ito ay katulad din ng paghataw ng business process outsourcing industry sampung taon na ang nakalipas.

 

Ito’y puno ng potensiyal para sa papasimulang negosyo at kayang magbigay ng magandang trabaho para sa mga artists at developers.

 

Sa galing ng mga Pilipino sa pagdidisenyo ng software, ang Pilipinas ay nagiging isa na sa mga paboritong destinasyon ng online video gaming companies para sa paggawa ng bagong produkto.

 

Maliban pa rito, kilala na rin ang mga Pilipino bilang isa sa mga aktibong manlalaro ng online games sa mundo.

 

Sa ngayon, mayroon nang halos 29 milyong Pilipino ang naglalaro ng online games. Sa nasabing bilang, nasa dalawampung milyon ang casual gamers habang nasa siyam na milyon ang tinatawag na midcore at hardcore gamer.

 

Kung mabibigyan ng sapat na suporta, lalo pang lalago ang potensiyal ng video gaming industry bilang pagmumulan ng trabaho at kabuhayan, maliban pa sa mga karangalan na gaya ng bigay ng Team Rave!

 

 

First Pubished on Abante Online

 

 

 

 

BIDA KA!: RAVEolution!

Mga Bida, ilan taon nang patok ang larong Defense of the Ancients o DOTA sa ating kabataan. Halos napupuno ang mga Internet cafés sa buong bansa dahil sa mga naglalaro ng DOTA.

 

Ang DOTA ay tinatawag na multiplayer online battle arena (MOBA) game kung saan dalawang grupo ng players ang naglalaro. Ang pakay ng laro ay sugurin at sirain ang base ng kalabang team.

Sa sobrang kasikatan nito, ginawan pa ito ng kanta ng dalawang Pinoy artist na may pamagat na, “DOTA o ako?” kung saan pinapipili ng babae ang kanyang boyfriend kung sino ang mas mahalaga.

 

Kung sa tingin ng iba, isa lamang libangan ang paglalaro ng DOTA, may isang grupo naman ng kabataang gumagawa ng pangalan sa Pilipinas at sa ibang bansa sa paglalaro nito.

 

Ito ay ang Team Rave na binubuo nina Ryo ‘ryOyr’ Hasegawa, Jio ‘Jeyo’ Madayag, Djardel ‘Chrissy’ Mampusti, Mark ‘Cast’ Pilar at Michael ‘nb’ Ross.

 

Kamakailan, humingi sila ng tulong sa aming tanggapan para makakuha ng pagkilala sa kanilang pagsali sa international DOTA tournaments.

 

Nahihirapan silang pumunta sa ibang bansa para makipagkumpetensiya dahil pinagdududahan sila ng mga embassy na sila lamang ay magti-TNT o tago nang tago, at ‘di na rin babalik ng bansa.

 

Maliban pa rito, hirap silang makakuha ng mga sponsors dahil hindi naman kinikilala ang kanilang paglalaro bilang isang totoong sport.

 

Sa kuwento nga ni Jio sa Facebook page ng Team Rave, dumating na sa punto ng kanyang pananatili sa South Korea na isang beses lang siya kumain sa isang araw.

 

Subalit hindi sila nawalan ng loob. Ipinagpatuloy pa rin nila ang kanilang career bilang mga professional e-sports players. Kung mayroon silang kinita mula sa isang tournament, agad nila itong ipinapadala sa mga pamilya nila sa Pilipinas.

 

***

 

Nabigyan ng malaking break ang Team Rave nang makapasok sila sa DOTA 2 Asian Championships (DAC) na mayroong kabuuang prize money na $2.94 million o P130 million noong nakaraang buwan.

 

Itinuring na underdog ang mga kabataang Pilipino sa event dahil ito’y madalas mapanalunan ng mga koponan mula sa China o Russia.

 

Subalit maraming ginulat ang Team Rave nang rumatsada ito patungong ikaanim na puwesto sa mundo. Natalo nila ang Team Hell Raiser mula Russia at Team Invictus mula China.

 

Subalit, natalo sila ng Team Big God mula China sa score na 2-1. Ang mga Tsinong ito ay mga matatagal nang naglalaro ng DOTA at nakikipaglaban sa mundo.

 

Kahanga-hanga ang naabot ng TeamRavePH. Hindi ito inaasahan dahil kasama nila sa torneo ang labing-anim na pinakamagagaling na DOTA teams sa mundo.

 

Nagbunga ang kanilang pagsisikap dahil nakapagbulsa sila ng P6.6 milyon o $150,000. Bukod dito, nakilala ang Pilipinas bilang isa sa mga bansang may pinakamagaling na DOTA players sa mundo.

 

At mga Bida, noong nakaraang linggo, nanalo na naman ang Team Rave nang talunin nila ang Team MVP Phoenix ng South Korea sa score na 3-2. Dahil dito, inihayag ang Team Rave bilang ang Summit 3 DOTA South East Asia Champions.

 

Sila ang kakatawan sa South East Asia sa Mayo sa Los Angeles, California para sa Grand Finals. May sigurado na silang P160,000 o $3,600, ngunit ang target nila ay maging kampeon sa mundo at manalo ng P2.7 milyon o $61,000.

 

***

 

Sa kabila ng karangalang hatid nito sa bansa, marami pa rin ang bumabatikos sa e-sport na ito. Kesyo nakakasira raw ito ng pag-aaral at nauubos na ang oras ng ilan sa paglalaro nito sa halip na magtrabaho.

 

Pero bago tayo humusga, dapat nating timbangin ang epekto nito sa lipunan. Ano nga ba ang nakakasakit? Ang boxing o ang paglalaro sa Internet café?

 

Dapat lang ilagay sa tama ang paglalaro nito dahil lahat naman ng sobra ay nakakasama na. Ang ilang mga siyudad at barangay nga ay ipinagbawal na ang paglalaro ng DOTA.

 

Ngunit malaki ang naitutulong ng DOTA para masanay sa strategic thinking, cooperation, teamwork at iba pang mahahalagang values para sa kabataan.

 

***

 

Ilang dekada ang nakalipas, pumatok sa bansa ang larong bilyar bunsod na rin ng tagumpay ni Efren ‘Bata’ Reyes. Sa kasagsagan ng kasikatan ng bilyar, sa halos lahat ng kanto ay may makikita kang bilyaran kung saan nag-uumpukan ang maraming tao.

 

Noong una ay hindi kasama ang bilyar sa Southeast Asian Games at Asian Games ngunit napilitan na rin ang organizers na isama dahil sa kasikatan nito.

 

Ilang beses na ring nakapag-uwi ng medalya para sa bansa sina Bata, Francisco “Django” ­Bustamante, Ronnie Alcano at maraming iba pa nating mga ­manlalaro.

 

Ganito rin ang nakikita ko sa e-sports. Malay ­natin, baka sa loob ng dalawang dekada ay kilalanin na rin ito bilang isang totoong sport at isama pa sa ­international events gaya ng Olympics.

 

Kapag nagkataon, mayroon na naman tayong pani­bagong pagkukunan ng karangalan. Kaya sa ating mga DOTA players, patuloy lang ang laban tungo sa tagumpay!

 

 

First Published on Abante

 

 

 

 

Scroll to top